с.  Носим

Лодыгинъяс

Районын эмöсь семьяяс, кытысь верöсыс и гöтырыс вöлiны война вылын. Выль во водзвылын удайтчис тöдмасьны öти татшöм гозъякöд. Тайö Носим сиктысь Елизавета Николаевна да Владимир Алексеевич Лодыгинъяс.

Ленинград дорйысь

Медбöръяысь Владимир Алексеевич вöлi Ленинградын да Петергофын 1986 воын, кор Олег внукыслы тырис сöмын на 4 арöс. Война помасьöм бöрын тайö вöлi мöд волöм. Пыр и шыбитчисны синмас бурланьö вежсьöмъяс. И таысь сьöлöм вылас лоис весиг долыдджык. Öд война кадö сiйö эз вермыв эскыны, мый коркö пуксяс тайö каръясас бур олöм, мый киссьöм керкаяс пыдди кыптасны выльяс, кодъяс важсьыс бурöсь.

Томдырйиыс В.А. Лодыгин уна кывлiс революциялöн чужанiн – Ленинград йылысь. Окота вöлi ветлыны сэтчö, тöдмасьны мир пасьта нималысь карнас. Но позянлуныс лои сöмын война кадö. И эз кö вöв войнаыс – öдвакö веськалiс сэтчö.

Владимир Алексеевич чужис Носим сиктын 1922 воын. Бать-мамыс да чойыс уджалiсны колхозын. Олicны сьöкыда. Трудодень вылö вo пoмас сетлiсны этшаник нянь, мукöдтор, но сьöм эз вичмыв. И медым керкааныс вöлi сьӧмтор, бать-мамыс пинысö медалісны уджавны связьлöн районса юкӧнӧ. Зонка вöлi сюсь, писькöс и регыдöн нин лои почтаса начальникöн. Уджалiс Немдiнын, Джеджимын. Джеджимсянь и босьтiсны армияö. Тайö вöлi 1941 вося сентябрь 9 лунö.

— Веськалi ме Севернöй флотö, — казьтылö ветеран. — Соловки дi вылын во чöж вöлi велöдчан отрядын. Велöдiсны шифровальщикö. Но омöля тöдi роч кыв, и вуджöдiсны связьö. Война чöжыс связисталi. Эг штабын пукав, а пыр вöлi передöвöй вылын. Смерть вöтлысис бöрсянь, сэкжö коли ловйöн. Контузитчылi да öнi на дойыс кылö.

Соловкисянь мöдöдicны Ленинградö. Блокада кадӧ быдсямасö сюрлiс аддзывны. Öнi на син водзас улича вылын тшыгла кулöм йöз. Ёна и жальыс петлiс, но отсавны нинöмöн эз вермы. И зэв рад лои, кор oрöдiсны блокада. Кар-герой дорйöмысь сылы ceтicны «За оборону Ленинграда» медаль. В.А. Лодыгин мездiс и Кёнигсберг. Та йылысь висьталö «За взятие Кёнигсберга» медаль.

Видзис войвыв

1942 вося ноябрь 25 лунлы паныда войö Лизалöн керка öшинь стеклöас кодкö таркöдчис. Мамыс петiс восьтыны керка öдзöссö. Керкаö пырис посыльнöй да cетic Лизалы военкоматсянь повестка. Повесткаас вöлi гижöма, медым ciйö ноябрь 25 лунö 9 час кежлö локтiс военкоматö.

— Ме шайпаймунi, — висьталö Елизавета Николаевна, — Эг виччысь, мый сэтшöм öдйö босьтасны война вылö. Сiдзсö ми нывъяскöд курсъяс вылын вöлiм, велöдiм пуысь вöчöм винтовка. Но думайтi, мый водзвыв юöртасны: öд колiс сдайтны делöяс.

— А мыйöн сэки уджалiныд?

— Менам ыджыд грамота эз вöв, но колхозса председатель мыйлакö индiс завхозöн. И ме вылын öшалiс складö меститöм урожай.

Эз и лэдзны делöясöс сдайтны. Военкоматын пöрччöдiсны пасьтöг, видлалicны да 12 часын шуисны петны туйö. Носимысь вöлiм нёль ныв. Колхозса председатель быдöнлы торйöдiс вöв. Сторожевскöдз мам менö нуис кора-доддьын. Сэсянь Часовоöдз восьлалiм подöн.

Елизавета Николаевна сiдзжö веськалiс войвылö, но сöмын Кандалакшаö. Лоис пулемётчицаöн. Расчётас вöлi 5 морт. Тайö торъя пулемётнöй батальоныс видзис войвывса енэж. Сюрлiс став сьöкыдыс. Но ныв аслас ёртъяскöд ставсö вeнic. Киыс эз дзöр, кор лыйлiс самолётъяс кузя. Война помас нывъясöс нуисны Дальньöй Востокö, кöть и японечьяскöд тышкасьны эз нин ковмы: Комсомольск карын суис победа. 1945 вося ноябрь 27 лунö воис гортас. Дальньöй Востокысь гортас локтiгöн, Е.Н. Лодыгиналы козин пыдди сетiсны 5 килограмм рис да сы мында жö еджыд пызь. Кöть и туйыс вöлi кузь, но сяммис ставсö вайны. Ок и ёна жö радлiсны гортсаясыс фронтöвöй козинъясыслы!

Öтлаын 46 во

Лодыгинъяслöн керкаыс дзик кыр йылас. Öшиньöдыс видзöдiгöн сиктыс быттьö ки пыдöс вылын. Стрöитчисны асьныс. Öнi öти вевт улын олöны пиныслöн семьяыскöд, сöмын посводз торйöдö. Олöны тыр ладöн. Видзöны öтув мöс, кык порсь, кук. Мöд пиыс Носимын жö. Эм кык ныв: öтиыс олö Кулöмдiнын, мöдыс Интаын. Ныв-пиныс ас кодьныс жö пыдди пуктана йöз.

Елизавета Николаевна да Владимир Алексеевич öтлаасисны 1948 воын. И нэмсö пуктiсны да пуктöны пыдди öта-мöднысö. А олöмыс и мирнöй кадö эз вöв кокни. Быдторйыс сюрлiс. В.А. Лодыгин уджалiс 60 арöсöдз. Война вылысь локтöм бöрын вöлi физкультура да спорт кузя райкомитетса председательöн, нарсудын судисполнительöн. 1951 воын помалiс электромеханикъясöс дасьтан курсъяс, бöрынджык велöдчис трактористö. Уджалiс электромеханикöн, трактористöн, бригадир-механикöн. Пенсия водзас пуръясис Кулöмдiнса кылöдчан контораын.

55 арöсöн пeтic пенсия вылö и Елизавета Николаевна. Куим во уджалiс библиотекарöн парткабинетын.

Кор лоис сьöкыд ветлыны Кулöмдiнö, пырис колхозö. Пенсия вылас петöм бöрын на отсасис совхозлы кöрым заптiгöн. Öнi сылы 74 арöс, но горт гöгöрсьыс став уджсö на бергöдö.

Оз весь ов и Владимир Алексеевич. Сiйö нуöдö ыджыд общественнöй удж. В.А. Лодыгин сельсöвет бердын котыртöм войнавывса да уджвывса ветеранъяслöн сöветса председатель.

— Владимир Алексеевич кывкутöмöн матыстчö аслас делö дорас, — висьталö войнавывса да уджвывса ветеранъяслöн районса сöветӧн юрнуӧдысь И.Г. Семяшкин. – Став индӧмсӧ пöртö олöмö. Волывлö да выступайтлö пленумъяс вылын и пыр вöзйö бур мöвпъяс.

Н. Лютоев

Парма гор, 1995, Тöв шöр 5 лун [5 янв.] (1 №).

 © Усть-Куломская межпоселенческая библиотека